යුක්තිය සාධාරණය වෙනුවෙන් සටන් කරන නිව්රෝ සන්සුන් ආකාරයෙන් ආක්‍රමණයට මුහුණ දෙයි. සාමාන්‍ය ජීවිතයේ දී කාරුණික බවක් පෙන්වයි. අනෙකාට උපකාර කිරීමට නොබියව ඉදිරිපත් වෙයි. සටනේ දී ජවාධිකව ඉදිරියට වෙයි. කෝපයෙන් ගිගුම් දෙයි.

නිව්රෝ පිළිබඳව නාම මාත්‍රිකව අපට අසන්නට ලැබෙන්නේ ඔමිගා වෙත තන්ඩර් විසින් එවන ලද පණිවිඩයක් මගිනි. පරෙවියෙකු අතේ එවන ලද එම පණිවිඩයේ සඳහන් වන්නේ “ෂර්මේන් කුමරිය” අතුරු දහන් වී ඇති බැවින් ඇයව සොයා ගැනීමට වහාම නිව්රෝට දන්වන ලෙසය.

ෂර්මේන් කුමරිය යනු සැවානා රාජ්‍යයේ රජතුමාගේ දූ කුමරිය යි.

නිව්රෝ පළමු වරට අප ඉදිරියේ පෙනී සිටින්නේ මහ සෙනෙවි විසින් ෂර්මේන් කුමරිය පැහැර ගෙන විත් නැවතී සිටින ස්ථානයේ දී ය. ඔහුගේ සටන් කිරීමේ විලාසය ඇරඹෙන්නේ මෙතැන දී ය. මහ සෙනෙවි වෙත දිවියෙකු ලෙස කඩා පනින නිව්රෝ පොළොවට පතිත වන්නේ මහ සෙනෙවි ඔහු ගේ වමතින් අල්ලා කරකවා අත හරින බැවිනි. ක්ෂණයකින් දෙකකුල් ඉහළට ඔසවන නිව්රෝ, මහ සෙනෙවියා ග්‍රහණයට ගන්නේ ගෙල සිර කිරීමෙනි. බිම වැටෙන මහ සෙනෙවි ඔහු ඔසවා ඈතට විසි කරන්නේ යගුලියක් විසි කරන්නා සේ ඉතා පහසුවෙනි. ඉනික්බිතිව කුමරිය බේර ගන්නා නිව්රෝ ඒන්ජල් සමග පැන යයි.

සැවානා රාජ්‍යයේ කුමන්ත්‍රණයක් ක්‍රියාත්මක වන්නේ, රජු මරා සිහසුන පැහැර ගැනීම සඳහායි. රජුගේ දෙවන බිසව නැතිනම් ෂර්මේන් කුමරියගේ සුළු මව, මහ සෙනෙවි සමග එකතු වී මේ කුමන්ත්‍රණය දියත් කරයි. අහම්බෙන් එය කුමරියට දැනගන්නට ලැබෙයි. ඒ හේතුවෙනි මහ සෙනෙවි විසින් ෂර්මේන් කුමරිය පැහැර ගනු ලබන්නේ.

බේරාගත් ෂර්මේන් කුමරිය ඔබිගා භාරයේ තබන නිව්රෝ සැවානා රාජ්‍යයේ රජ මැදුරට පිවිසෙයි. උප සෙනෙවි තන්ඩර් ගේ උපකාරයෙන් රජතුමා බේරා ගෙන කුමරිය වෙත රැගෙන එයි.

රජතුමා බේරාගත් බව හෙළිදරව් වූ පසුව මහ සෙනෙවි අණ කරන්නේ නිව්රෝ සමග රජතුමා සහ කුමරිය ජීවග්‍රහණයෙන් අල්ලා ගෙන එන ලෙසයි. එහෙයින් ලූෂන් සෙනවියාගේ නායකත්වයෙන් යුතු විශාල සේනාංකයට මුහුණ දෙන්නට නිව්රෝට සිදුවෙයි.

නිව්රෝ යන මග හරස් කර විශාල ගසක් පෙරළා දමා ඇති බව දකින නිව්රෝ එය ඉවත් කරන්නට සූදානම් වෙයි. ඔහු එසැණින් උගුලක හසුවෙයි. ශක්තිමත් කඹයකින් තැනූ මද්දක සිරවන ඔහු කඹය ඇද වට්ටන්නේ පර්වතය මුදුනේ කඹය අල්ලාගෙන සිටින යුධ සේනාවත් සමගයි.

එහෙත් සේනාවට මැදි වන නිව්රෝට යටත් වීමටත්, ඔවුන් සමග මාළිගයට යාමටත් සිදුවෙයි. එහි දී ඔහුට මිනීමරු සිංහයෙකු සමග සටන් කර දිවි ගලවා ගන්නට සිදුවෙයි. එසේම යකඩ දම්වැලින් ඔහු සිර කර බැඳ තබා ඇති යෝධ කුළුණු දෙකින් මිදී සටන් කිරීමටත් සිදුවෙයි. එසේ බිහිසුණු සටනකින් පසු මහ සෙනවියාගේ ග්‍රහණයෙන් මාළිගය නිදහස් කර ගැනීමට නිව්රෝ සමත් වෙයි.

නිව්රෝ මේ සියල්ලට මුහුණ දෙන්නේ, ඔහු සතු වීර චරිතය ඉස්මතු වෙන අයුරිනි. සිය වීරත්වය ප්‍රදර්ශනය කරමින් සිහසුන රැක දීම වෙනුවෙන් රජුගෙන් නිව්රෝට හිමිවන අගනාම තිළිණය වන්නේ සැවානා රාජ්‍යයේ රජුගේ දියණිය වූ ෂර්මේන් කුමරිය ඔහුට සරණ පාවා දීමයි.